Pita od gotovih kora, bolja od domaće
Postoji caka da vam pita izgleda kao domaća. Prilikom serviranja slobodno možete da odglumite preumornost jer ste ih razvlačili cijelo jutro, a ustvari niste. Naime, radi se o gotovim korama, rjeđem filu i posutim suvim brašnom po korama.
Sastojci:
1/2 gotovih kora za baklave
2 jaja
200 ml kisele vode
50 ml ulja + oko 100 ml ulja
180 ml jogurta
1 prašak za pecivo
oko 300 gr brašna + oko 100 gr za posipanje
1 kašičica soli
oko 250-300 gr sitnog sira
susam i 1 jaje
Način pripreme:
Fil pripremite tako što ćete umutiti jaja, kiselu vodu, jogurt i ulje pa dodajte brašno pomiješano sa praškom za pecivo i solju. Na kraju dodajte sir. Smjesa bi trebala da bude malo gušća od smjese koju pravite za palačinke. Onda pripremite kore, koje bi trebale da su za baklavu. Dakle one tanke i fine. Prvu koru samo nauljite i to sa dvije kašike ulja. Trudite se da ulje bude svuda ravnomjerno raspoređeno(možete čak da koristite i silikonsku četkicu), pa stavite drugu koru preko. Rasporedite onda fil preko te druge kore, par kašika fila ide na koru, pa onda prstima uhvatite brašno i pospite preko fila (gledajte da brašno pokrije sav fil na kori). Zatvorite krajeve, urolajte pa umotajte u pužića i redjajte u podmazani pleh. Ponovite sve i sa ostalim korama. Fil bi trebao da vam ostane taman da imate da prelijte svaku koricu u plehu. Pospite susamo odgore i pecite u rernu nekih 20 minuta na 200C.